«Навбаҳор» голларга бой водий дербисида «Нефтчи»ни мағлуб этди
Суперлига 28-турининг марказий ўйини 20 ноябрь куни Наманганда ўтказилди.
«Навбаҳор» водий дербиси деб номланадиган баҳсда Фарғонанинг «Нефтчи» клуби билан куч синашди.
26-дақиқада Алишер Одиловнинг голи «Нефтчи»ни ҳисобда олдинга олиб чиқди. 41-дақиқада Владимир Йовович майдондан четлатилиб, меҳмонлар режасини бузиб юборди. Жасур Жалолиддинов шу заҳоти ҳисобни тенглаштиришга эришди
Иккинчи бўлимда «Навбаҳор» яна икки бор рақиб дарвозасига гол урди. 53-дақиқада Кожо, 55-дақиқада Диёр Холматов меҳмонлар дарвозасини ишғол этди. «Нефтчи» бунга Куао голи билан жавоб берди.
Қолган дақиқаларда ҳисоб ўзгармади ва «Навбаҳор» 3:2 ҳисобида ғалаба қозонди.
Мусобақа якунланишига 2 тур қолганида «Нефтчи» 64 очко билан пешқадамлик қилмоқда ва чемпионликка жуда яқин турибди. Иккинчи ўриндаги «Пахтакор» ҳисобида 59 очко бор. «Навбаҳор» 58 очко билан учинчи ўринда бормоқда.
Суперлига. 28-тур
Навбаҳор – Нефтчи 3:2
Голлар: Алишер Одилов, 26 (0:1), Жасурбек Жалолиддинов, 42 (1:1), Жоел Кожо, 53 (2:1), Диёр Холматов, 55 (3:1), Коффи Коуао, 77 (3:2).