«Ливерпуль» «Фенербахче» ҳимоячисига қизиқиш билдирмоқда
«Ливерпуль» «Фенербахче»нинг чап қанот ҳимоячиси Арчи Браунни ўз сафига қўшиб олиш имкониятини ўрганмоқда.
24 ёшли футболчи яқинда Чемпионлар лигаси доирасида «Ливерпуль»га қарши ўтказилган учрашувда ажойиб ўйин намойиш этди. Истанбулликлар 3:2 ҳисобида ғалаба қозонган баҳсда англиялик ҳимоячи битта гол ва битта голли узатма муаллифи бўлди.
Transfer News Live нашрининг TEAMtalk маълумотларига таяниб хабар беришича, Брауннинг ушбу учрашувдаги ҳаракатлари «Ливерпуль» вакилларида катта таассурот қолдирган ва мерсисайдликларнинг унга бўлган қизиқишини янада оширган.
Футболчининг ўйинларини «Манчестер Юнайтед» ҳамда АПЛнинг бошқа бир қатор клублари ҳам кузатиб бормоқда. Transfermarkt портали унинг трансфер қийматини 18 миллион евро деб баҳолаган. Брауннинг ўзи ҳам фаолиятини Англияда давом эттиришга қарши эмас.
