ПСЖга қарши ўйиндан кейинги можаро: «Лилл» президенти тўрт ойга четлатилди
Франциянинг «Лилл» клуби президенти Оливье Летанг ҳакамлар фаолиятини танқид қилгани сабабли тўрт ойга футбол билан боғлиқ расмий фаолиятдан четлатилди. Ушбу қарор Франция футбол федерациясининг апелляция комиссияси томонидан қабул қилинди. Бу ҳақда AFP ахборот агентлиги хабар бермоқда.
Манбага кўра, можаро август ойида «Лилл» ва ПСЖ ўртасидаги 2:2 ҳисобида якунланган учрашувдан кейин юзага келган. Летанг ўйинга қўшиб берилган вақт ва ҳакам Эрик Вательенинг айрим қарорларидан норозилик билдирган. Кейинчалик у ҳакамлар раҳбарияти ҳамда футбол ташкилотларига расмий мурожаатлар йўллаган.
Дастлаб «Лилл» президентига 20 минг евро миқдорида жарима белгиланган эди. Бироқ Франция футбол федерацияси ушбу жазони етарли эмас деб ҳисоблаб, қарор устидан шикоят қилган. Натижада Летанг олти ойлик дисквалификацияга учради. Жазонинг икки ойи шартли бўлиб, қолган тўрт ойи амалда қўлланади.
Маълумот учун, Оливье Летанг аввал ҳам ҳакамлар фаолиятига оид баёнотлари сабаб интизомий жазога тортилган. Клуб раҳбарияти янги қарордан норозилигини билдириб, тегишли ташкилотларга апелляция киритиш имкониятини кўриб чиқмоқда.
