Элдор Шомуродовнинг биринчи мураббийи: \"Шомуродов Туркияга боргани яхши\"
Сўнгги пайтларда Ўзбекистон миллий терма жамоаси сардори Элдор Шомуродовнинг "Рома"дан бошқа клубга ўтиши ҳақида кўплаб хабарлар чиқмоқда.
Унга Туркиянинг "Истанбул Башакшеҳир", Франциянинг "Ренн", Италиянинг "Кремонезе" клублари қизиқаётгани ҳақида янгиликлар чиқди. Sports24.uz сайти Шомуродовнинг "Машъал" академиясидаги биринчи мураббийи Отажон Авезовдан бу вазият бўйича интервью олди.
- Элдор Шомуродовнинг биринчи мураббийи сифатида унга қандай маслаҳат берган бўлардингиз? Қайси клубга ўтгани яхши?
- Сайтлардан янгиликларни ўқиб боряпман. Туркиядан, Франциядан, Италияни ўзидан ҳам қизиқишлар борлигидан хабарим бор. Шахсий фикримча Элдор ҳозир "Рома"дан кетгани яхши.
- Нега?
- Сабаби клубга янги мураббий келди ва энди Шомуродов асосий таркибга муносиб эканини исботлаши керак бўлади. Ўтган мавсумни эсланг, биринчи даврада деярли майдонга тушмади, имкон беришмади. Қишда ҳаттоки бошқа клубга ижарага ўтишга яқин эди. Январь ойида Раньери келгач, унга имкон берди ва кетма-кет голлар уриб асосий таркиб футболчиси эканини исботлаганди. Ой футболчиси ҳам бўлди. Агар "Рома"да қолса яна шу нарса такрорланиши мумкин, кейинги йил ёзда бизни Жаҳон чемпионати кутмоқда. Элдор терма жамоамиз сардори, шу сабаб мундиалга яхши формада бориши учун ўз клубида асосий таркибда ўйнаши керак.
Шу боис менга қолса Туркия клубига ўтгани яхши. "Башакшеҳир" яқинда Кшиштоф Пёнтекни Қатарга каттагина пулга сотди. Билишимча клуб айнан унинг ўрнига Шомуродовни олиб келмоқчи. Элдорнинг ўзи билан гаплашганимда ҳам Туркия варианти устунроқ эканини айтди.
- Италиянинг ўзидан ва Франциядан ҳам таклифлар борку…
- Францияга бориш дегани бу янги мамлакат, янги муҳит дегани. Менимча у Италиянинг ўртамиёна ёки аутсайдер клубида ўйнашдан чарчади. Масалан, "Кремонезе" эндигина А серияга чиқди. У ерда жамоа янгитдан тузилса керак, бу ярим йил футболчилар ўзаро тил топшиши керак дегани. Аутсайдер клубларда ҳужумчи гол уриш учун жуда кам имкониятга эга бўлади. Ҳужумчи гол урмаса танқид остида қолаверади.
