Iraola «Liverpul» bosh murabbiyiga aylanishi mumkin – Romano
«Liverpul» jamoasida bosh murabbiy lavozimi uchun Arne Slot ketadigan bo‘lsa, Andoni Iraola nomzodi ko‘rib chiqilmoqda. Bu haqda insayder Fabrizio Romano o‘z podkastida ma’lum qildi.
Manbaga ko‘ra, Iraola allaqachon «Kristal Peles»dan taklif olgan, ammo hali yakuniy qarorini qabul qilmagan. Ispaniyalik mutaxassis o‘z faoliyatini davom ettirish uchun eng maqbul variantni tanlash niyatida va Angliya Premer-ligasi klublariga ustuvorlik bermoqda.
Habarda aytilishicha, «Liverpul» rahbariyati yaqin kunlarda Slot bilan uchrashuv o‘tkazadi, u yerda mavsum yakunlari muhokama qilinib, niderlandiyalik murabbiyning kelajagi yuzasidan qaror qabul qilinadi.
Eslatib o‘tamiz, avvalroq Iraola mavsum oxirida «Bornmut»dan ketishi ma’lum bo‘lgan edi. Ispaniyalik mutaxassis jamoani 2023 yil yozidan beri boshqarib kelmoqda.
So‘nggi kunlarda bir qator ommaviy axborot vositalari Slot mavsum oxirida «Liverpul»dan ketishi mumkinligi haqida xabar bergandi.
