RIZIN чемпиони эски рақибига қарши реванш жангида иштирок этади
Япониянинг RIZIN промоушени йил якунидаги йирик турнир учун навбатдаги шов-шувли беллашувни тасдиқлади. Енгил вазн чемпиони Луис Густаво япониялик таниқли жангчи Микуру Асакурага қарши реванш жангида иштирок этади. Бу ҳақда MMA Fighting нашри 4 ноябрь куни хабар берди.
Манбага кўра, жанг 31 декабрь куни Нагоя шаҳрида ўтказиладиган Super RIZIN 6 турнирида бўлиб ўтади. Ушбу тўқнашув кечанинг иккинчи асосий жанги сифатида белгиланган.
Густаво ва Асакура илгари ҳам ўзаро тўқнаш келган. Энди улар яна бир бор куч синашади. Бироқ промоушен ҳозирча ушбу реваншда чемпионлик камари ўртага қўйилишини тасдиқламаган.
Маълумот учун, Super RIZIN 6 турнири доирасида жами ўнта жанг эълон қилинган. Кечада учта чемпионлик беллашуви ва иккита Гран-при финали ташкил этилади.
