“Тенерифе” мухлислари вафот этган футболчи хотирасига стадион олдида ёдгорлик ташкил этди
Испаниянинг “Тенерифе” клуби мухлислари 30 ёшида вафот этган ҳужумчи Хесус де Мигел хотирасига ҳурмат бажо келтирди. Юзлаб ишқибозлар стадион олдида тўпланиб, футболчини сўнгги йўлга кузатиш мақсадида махсус хотира бурчагини ташкил этди. Бу ҳақда Relevo нашри хабар бермоқда.
Манбага кўра, мухлислар “Хелиодоро Родригес Лопес” стадионининг 9-рақамли кириш дарвозаси ёнига гуллар, шамлар, клуб шарфлари, футболчининг суратлари ва хотира мактубларини олиб келган. Айнан шу дарвозанинг танланиши бежиз эмас — Хесус де Мигел “Тенерифе” сафида 9-рақамли футболкада ҳаракат қилган.
Йиғилганлар футболчи хотирасига бир дақиқалик сукут сақлаган, сўнг узоқ вақт қарсак чалиб, унинг номини ҳайқиришган. Мухлислардан бири клубдан Хесус де Мигел ўйнаган 9-рақамни абадийлаштиришни сўраган. Ушбу таклиф йиғилганлар томонидан олқишлар билан кутиб олинган.
Маълумот учун, Хесус де Мигел 2 ноябрь куни “Андорра”га қарши учрашувда рақиб дарвозабони Хесус Овоно билан тўқнашиб кетганидан кейин юраги тўхтаб қолган. Футболчи шифохонага етказилган, бироқ 3 ноябрь куни 30 ёшида вафот этган. “Тенерифе” клуби 7 ноябрь куни стадионда унинг хотирасига бағишланган оммавий хотирлаш маросимини ўтказади.
