19 та жангда мағлуб бўлмаган чемпион RIZINдаги сўнгги жангини ўтказади!
Қирғизистонлик мағлубиятсиз жангчи Ражабали Шайдуллаев Япониянинг RIZIN ташкилотидаги сўнгги жангига тайёрланмоқда. У промоушенни тарк этишидан олдин чемпионлик камарини яна бир бор ҳимоя қилади. Бу ҳақда MMA Fighting нашри 4 ноябрь куни хабар берди.
Манбага кўра, Шайдуллаев 31 декабрь куни Нагояда ташкил этиладиган Super RIZIN 6 турнирида япониялик Кёма Акимотога қарши жанг қилади. Беллашув ярим енгил вазн тоифасидаги чемпионлик камари учун бўлиб ўтади.
Қирғизистонлик спортчи 2027 йилда MVP MMA ташкилотига ўтиши режалаштирилгани сабаб мазкур тўқнашув унинг RIZINдаги сўнгги чиқиши бўлиши кутилмоқда. Акимото эса чемпионни мағлуб этиб, унинг камарини қўлга киритишга ҳаракат қилади.
Маълумот учун, Шайдуллаев профессионал MMAда 19 та жанг ўтказиб, барчасида ғалаба қозонган. Унинг 18 та ғалабаси муддатидан олдин якунланган.
