Мавсумдаги илк чиқиш: «Валядолид» Ла Лигани тарк этади
Испаниянинг «Валядолид» клуби жорий мавсумда Ла Лигани расман тарк этаётган илк жамоа бўлди. Чемпионатнинг 33-турида «Бетис»га меҳмонда 1:5 ҳисобида мағлуб бўлган жамоа турнир жадвалининг энг сўнги — 20-поғонасида қолиб кетди. Ҳозирча жамоанинг ҳисобига жами 16 очко тўпланган.
Қутқарувчи — 17-ўриндан 18 очколи ортда қолган «Валядолид»нинг элита дивизионда қолиш имконияти энди математик жиҳатдан ҳам йўқолди. Чунки мавсум тугунича бор-йўғи бешта тур қолди.
Жамоа учун айниқса, мавсумнинг сўнгги қисми муваффақиятсиз ўтди — сўнгги 14 учрашувда жамоа атиги битта очко тўплади. Охирги ғалаба эса 11 январ куни қайд этилган — «Валядолид» ўшанда ўз майдонида айнан «Бетис»ни 1:0 ҳисобида енгганди. Айни пайтда Ла Лигада етакчиликни «Барселона» (76 очко) сақлаб турибди, иккинчи ўринда эса Мадриднинг «Реал» жамоаси (72 очко) бормоқда.
