Паралимпия ва жаҳон чемпионлари Тошкентда баҳслашади
2–4 ноябрь кунлари Тошкентдаги “Ўзбекистон Олимпия шаҳарчаси” спорт стадионида пара енгил атлетика бўйича Ўзбекистон очиқ чемпионати бўлиб ўтади. Таъкидлаш лозимки, мазкур мусобақа келаси йили пойтахтимизда ўтадиган пара енгил атлетика бўйича жаҳон чемпионатининг синов турнири (Tashkent 2027 Test Event) мақомига эга.
Турнирда Бразилия, Хитой, Чехия, Дания, Греция, Ҳиндистон, Польша, АҚШ ва Ўзбекистондан жами 300 дан ортиқ пара атлет 126 та йўналишда (64 та эркаклар ва 62 та аёллар) куч синашади.
Мусобақа давомида Жаҳон Пара енгил атлетика ташкилоти ва Маҳаллий ташкилий қўмита майдон ичида ҳам, майдондан ташқарида ҳам бир қатор операцион ва мусобақавий жараёнларни синовдан ўтказади.
Ушбу мусобақада қатнашувчи таниқли пара спортчилар:
Бразилия (29 нафар спортчи) — Нью-Деҳли-2025 жаҳон чемпионатида медаллар жадвалида биринчи ўринни эгаллаган жамоа:
▪️ Елцин Жакс — 1500 м T11 бўйича икки карра Паралимпия чемпиони, жаҳон чемпиони ва жаҳон рекорди эгаси
▪️ Жулио Агрипино — 5000 м T11 бўйича Паралимпия чемпиони ва жаҳон рекорди эгаси
▪️ Рикарду Гомис ди Мендонса — 100 м T37 бўйича Паралимпия ва жаҳон чемпиони
▪️ Ванна Брито (ядро улоқтириш F32) ва Элизабет Гомис (F53) — жаҳон чемпионлари
Хитой — Айти-Нагоя-2026 Осиё Пара ўйинларидаги муваффақиятлардан сўнг:
▪️ Вен Сяоян — 9 карра Паралимпия чемпиони (100 м, 200 м ва узунликка сакраш T37)
▪️ Фейфей Чжоу — ядро улоқтириш ва найза улоқтириш F57
▪️ Дэн Пейчен — 100 м T36, Осиё Пара ўйинларида жаҳон рекорди муаллифи
▪️ Хунся Лян ва Сяоцзюань Лай — Осиё Пара ўйинлари чемпионлари ва жаҳон рекорди эгалари
АҚШ:
▪️ Ноа Малон — Париж-2024 Паралимпия чемпиони (100 м T12)
▪️ Хоел Гомес — 1500 м T13 бўйича жаҳон чемпиони
Польша:
▪️ Фаустина Котловска — диск ва ядро улоқтириш F64 бўйича жаҳон чемпиони
Ўзбекистон терма жамоаси ҳам кучли таркибда майдонга тушади:
▪️ Бобиржон Омонов — ядро улоқтириш F41, Паралимпия чемпиони
▪️ Қудратиллохон Маъруфхўжаев — ядро улоқтириш F37, Париж-2024 чемпиони
▪️ Хусниддин Норбеков — ядро улоқтириш F35, Токио-2020 ва Париж-2024 чемпиони
▪️ Ёрқинбек Одилов — найза улоқтириш F57, Париж-2024 чемпиони
▪️ Толиббой Йўлдошев — диск улоқтириш F37, Париж-2024 чемпиони
Омонов, Маъруфхўжаев, Норбеков ва Одилов яқинда Айти-Нагоя-2026 Осиё Пара ўйинларида ҳам ўз унвонларини муваффақиятли ҳимоя қилган.
Эслатиб ўтамиз, Тошкент-2027 пара енгил атлетика бўйича жаҳон чемпионати келгуси йил 19–27 июнь кунлари бўлиб ўтади. Бу Ўзбекистон тарихида ўтказилган энг йирик Пара спорт мусобақаси бўлади.
