«Манчестер Юнайтед» Ҳюрцелер учун катта миқдорда товон пули тўлаши мумкин

«Манчестер Юнайтед» Майкл Кэррикнинг эҳтимолий ўринбосарлари рўйхатига Фабиан Ҳюрцелерни киритди. Бироқ «Брайтон»нинг амалдаги бош мураббийини таклиф қилиш манкунианликларга рекорд даражадаги маблағга тушиши мумкин. Бу ҳақда The Telegraph нашри хабар бермоқда.

Ёзда 33 ёшли немис мутахассиси «Брайтон» билан шартномасини 2029 йилгача узайтирди. Шартномада белгиланган товон пули кўрсатилмаган. Шу сабабли мураббийни ўз сафига қўшиб олмоқчи бўлган клуб «чайкалар» раҳбарияти билан тўғридан-тўғри музокара олиб боришига тўғри келади.

Мураббийлар учун тўланган товон пули бўйича аввалги рекордлар Грэм Поттер ва Юлиан Нагельсманн билан боғлиқ келишувларга тегишли. «Челси» Поттер учун «Брайтон»га 21,5 миллион фунт стерлинг тўлаган бўлса, «Бавария» Нагельсманн учун «РБ Лейпциг»га 21,7 миллион фунт стерлинг тўлаган. Нашр маълумотларига кўра, Ҳюрцелер жамоани тарк этган тақдирда, «Брайтон» бундан ҳам кўпроқ товон пули талаб қилиши мумкин.

Немис мутахассисига бўлган қизиқиш унинг жамоаси қайд этаётган натижалар билан ҳам боғлиқ. Англия Премьер-лигасининг дастлабки етти туридан сўнг «Брайтон» учинчи ўринни эгаллаб турибди ва чемпионатда энг кўп гол урган жамоа ҳисобланади.