Рамазон Темировнинг UFC 333 турниридаги жанги қачон бошланади?
Ўзбекистонлик аралаш яккакураш устаси Рамазон Темиров 24-октябрь куни Бирлашган Араб Амирликларининг Абу-Даби шаҳрида ташкил этиладиган UFC 333 турнирида навбатдаги жанги ўтказади. Ҳамюртингизнинг рақиби британиялик Лон’эр Каванаг бўлади. Жанг Тошкент вақти билан 25-октябрга ўтар кечаси тахминан соат 00:15 да бошланиши кутилмоқда. Бу ҳақда MMA Метарейтингс нашри хабар бермоқда.
Манбага кўра, Темиров ва Каванаг ўртасидаги тўқнашув турнирнинг асосий кардидан жой олган. Асосий жанглар Тошкент вақти билан 24-октябрь куни соат 23:00 да бошланади. Ўзбекистонлик спортчи асосий карддаги учинчи жангда октагонга чиқади. Жангнинг бошланиш вақти ундан олдинги беллашувларнинг давомийлигига қараб ўзгариши мумкин.
29 ёшли Рамазон Темиров профессионал MMA фаолиятида 20 та ғалаба ва 3 та мағлубият қайд этган. Унинг рақиби, 27 ёшли Лон’эр Каванаг ҳисобида эса 10 та ғалаба ва 2 та мағлубият мавжуд. Британиялик жангчи UFC рейтингида олтинчи, Темиров эса ўнинчи ўринда бормоқда. Мазкур беллашув ғолиби энг енгил вазн тоифасининг юқори поғоналарига кўтарилиш имкониятига эга бўлади.
Маълумот учун, UFC 333 турнири Абу-Дабидаги Etihad Arena мажмуасида ўтказилади. Оқшомнинг марказий жангида Александр Волкановски ва Мовсар Евлоев ярим енгил вазн тоифасидаги чемпионлик камари учун тўқнаш келади. Шунингдек, Пётр Ян ва Мераб Двалишвили ўртасида ҳам чемпионлик жанги ташкил этилади.
