Игорь Литовка: \"Жаҳон чемпионатида Ўзбекистонга мухлислик қиламан\"
"Андижон" клубининг собиқ дарвозабони Игорь Литовка бугунги кунда Грузиянинг "Гагра" клубида ўйнамоқда. Sports24.uz сайти украиналик посбон билан суҳбатлашди.
- Эшитишимча, кичкиналигимизда карате билан шуғулланганcиз. Шу ростми? Футболга қандай ўтгансиз?
- Ҳа, бошланғич синфда карате билан шуғулланганман, анча муваффақиятли қатнашганман. Кейинчалик мураббийим бошқа жойга кўчиб кетди ва мен машғулотларга қатнашишни хоҳламай қолдим. Уйда ўтирганимда, дўстим футбол тўгарагига боришни таклиф қилди. Ҳимоячи сифатида бошлаганман. Кейинчалик ўйинга кечикиб келганим учун (автобус бузилиб қолган) таркибга кира олмадим, дарвозабонимизни ит тишлаб олганида эса мени энг баланд бўйли сифатида дарвозага қўйишди. Ўшандан бери айнан дарвозада ўйнаяпман.
- Нега айнан дарвозабон бўлгансиз?
- Дарвозабон - бу катта масъулият, бу жамоанинг ярми. Бу кучли психология ва катта босим. Шунинг учун бўлса керак, биз майдондаги футболчилардн кўра кўпроқ фаолият олиб борамиз. Ёшимиз улғайган сари ўйинни яхшироқ ҳис қиламиз.
- Қаерда туғилгансиз?
- Днепропетровск вилояти, Никопол шаҳрида. Ҳозир менинг шаҳрим мунтазам равишда дронлар ва ракеталар билан ўққа тутилмоқда. Мен ўз шаҳримдаги болалар футболини ҳар томонлама қўллаб-қувватлашга ҳаракат қиламан.
- Андижонга қандай келиб қолгансиз?
- Мени Улуғбек Мирзаев таклиф қилганди. Оиламиз билан Хорватияда эдик ва ўз кучимни янги чемпионатда синаб кўришга қарор қилдим.
- "Андижон" клуби сиз учун қандай аҳамият касб этади?
- "Андижон" - бу шунчки клуб эмас! Мен буни такрор-такрор айтганман. Бу катта оила. Менга мухлислар ҳамон салом йўллаб, ёзиб туришибди. Туғилган куним билан табриклашажи. Албатта, шартнома бўйича ҳал қилинмаган масалалар бор, аммо клуб барча мажбуриятларини бажаришига ишонаман. Ҳозир клубда жуда яхши мутахассис ишлайди. Ёшлигимдаёқ унинг ўйинларини телевизор орқали кузатганман, кейинчалик бир майдонда ўйнашга ҳам муваффақ бўлдим. Ишончим комилки, Максим Александровичнинг қўлидан ҳамма иш келади.
- Андижонлик мухлислар ҳақида нима дея оласиз?
- Андижон мухлислари Республикадаги 1-рақамли! Андижондагидек ҳеч қаерда қўллаб-қувватлай олишмайди! Ҳозир бутун чемпионатда трендни айнан бизнинг мухлислар белгиламоқда ва қолган мухлислар ҳам "Ултрас Бургут"га қараб ривожлана бошлаганини сезиш мумкин. Стадион эса ўйинлардан кейин бир неча бор менинг фамилиямни айтиб ҳайқирганини ҳеч қачон унутмайман. Бу катта ҳурмат белгиси ва мен уларга ўз ҳурматимни кўрсатиш учун қўлимдан келганини қилдим.
- Қайси ғалабали ўйинни ҳеч қачон унутмайсиз? Ва яна бир савол қайси мағлубият сиз учун энг аламлиси?
- Ғалаба қозонган ўйинга келсак, ҳиссиётларга кўра бу "Навбаҳор" билан дерби. Неймар ОЧЛда "Навбаҳор"ни енга олмаганда, биз уйда ғалаба қозонгандик. Бу ҳамма учун ақл бовар қилмайдиган байрам эди. Шаҳар тун бўйи ухламаганди! Сўнгги дақиқаларда "Сўғдиёна"дан учралган мағлубият аламли бўлди, биз иккита кутилмаган гол ўтказиб юбордик. Ўша ўйинда бу натижага лойиқ эмасдик.
- Александр Хомяков футболчилик даврида дарвозабон эди, Александр Шовковский ҳам дарвозабон бўлган. Футболни тугатгач, сиз ҳам мураббий бўлмоқчимисиз?
- Дарвозабонлар майдондаги футболчилардан кўра кўпроқ ўйинга берилиб кетишади. Айнан шунинг учун кўпинча дарвозабонлар яхши мураббийга айланишади. Ҳозирча бош мураббий бўлиш ҳақида умуман ўйламаяпман, аммо дарвозабонлар билан ишлаш - бу мен ўзимни футболчилик фаолиятимни якунлаганимдан кейин кўраётган нарсам.
- Дарвозабонлар орасида Сизнинг кумирингиз ким эди?
- Футбол кўра бошлаганимда, табиийки, бу Александр Шовковский эди. "Динамо"га қарши биринчи марта майдонга тушганимда ва ўйиндан кейин қўлимни сиқиб қўйганида, бу ҳаяжон ҳозиргидек ёдимда. Ҳозир эса кимнидир танлаш қийин бўлади. Ҳар кимдан нимадир олишга ҳаракат қиламан. Кимдир оёқда яхши ўйнайди, кимдир чизиқда. Ҳозир Ян Зоммерни кузатяпман. Узоқ вақт давомида ишончли ўйин намойиш этмоқда. Войцех Шчесни бу мавсумда футболга қайтди ва деярли барча мусобақада ғалаба қозонди.
- Украина терма жамоаси фақат бир марта жаҳон чемпионатига чиққан. У ерда ҳам чорак финалга чиқиб, кичик сенсация яратганди. Нима деб ўйлайсиз, ЖЧ-2026га чиқиш учун қандай имкониятлар бор? Гуруҳингизда Франция, Исландия ва Озарбайжон бор.
- Аввало, Ўзбекистонни тарихда илк бор Жаҳон чемпионатига йўл олгани билан табриклайман. Бу ақл бовар қилмайдиган ютуқ! Ҳа, бизда доимо нимадир содир бўлади... Бу қанчалик ачинарли бўлмасин. Ҳозир терма жамоада авлодлар алмашмоқда. Кўрамиз, бундан нима чиқаркин. Франция сўнгги пайтларда тез-тез финалларда ўйнамоқда. Бу футбол-ку. Томоша қиламиз ва жамоамизни қўллаб-қувватлаймиз. Жаҳон чемпионатида эса Ўзбекистонга ҳам мухлислик қиламан.
