UFCнинг тажрибали жангчиси шартномаси тугамасдан ташкилотни тарк этди
Бразилиялик ММА жангчиси Норма Дюмон UFC билан ҳамкорлигини якунлаганини эълон қилди. 36 ёшли спортчи ташкилот билан шартномаси бўйича яна иккита жанг ўтказиши керак бўлганига қарамай, муддатидан олдин кетишга қарор қилган. Бу ҳақда MMA Fighting хабар бермоқда.
Манбага кўра, Дюмонга UFC билан амалдаги келишуви якунланганидан кейин янги шартнома таклиф қилинмаслиги олдиндан маълум қилинган. Шу сабабли у ташкилотдан кетиш бўйича мурожаат қилган ва раҳбарият унинг илтимосини қондирган. Бразилиялик спортчи фаолиятини якунлаш ҳақида ҳам ўйлаганини тан олган.
Бироқ Дюмонга бошқа ташкилотлардан манфаатли таклифлар келиб тушган. Хусусан, йирик бокс промоутерларидан бири унга профессионал боксда жанг қилиш имкониятини таклиф этган. Яна бир ММА ташкилоти эса чемпионлик камари учун жанг ўтказиш таклифи билан чиққан. Жангчининг айтишича, ҳозирча у боксга ўтиш вариантига кўпроқ қизиқмоқда ва 2027 йилда рингга чиқиши мумкин.
Маълумот учун, Норма Дюмон UFCда саккиз йил давомида фаолият олиб бориб, 13 та жанг ўтказган. Уларнинг тўққизтасида ғалаба қозониб, тўрттасида мағлуб бўлган. Бразилиялик спортчи сўнгги икки баҳсида Жоселин Эдвардс ва Айлин Пересга ҳакамлар қарори билан имкониятни бой берган.
