Скотт Мактоминей ЖЧ бошланишидан икки кун олдин шифохонага ётқизилганини маълум қилди
Шотландия миллий терма жамоаси ва Италиянинг «Наполи» клуби ярим ҳимоячиси Скотт Мактоминей 2026 йилги жаҳон чемпионати олдидан юраги билан боғлиқ жиддий муаммога дуч келганини ошкор қилди. Футболчи мундиалдаги илк учрашувдан атиги икки кун аввал шифохонада муолажа олган. Бу ҳақда AFP хабар бермоқда.
Манбага кўра, 29 ёшли футболчининг юрак уриш ритмида бузилиш аниқланган. Шу сабабли у Гаитигa қарши учрашув олдидан шифокорлар назоратида юрак ритмини тиклаш муолажасидан ўтган. Ўша вақтда Мактоминейнинг машғулотларда қатнашмаётгани ошқозонидаги муаммо билан изоҳланган эди.
«Гаитигa қарши ўйиндан икки кун олдин юрагимга электр импульси беришларига тўғри келди. Жаҳон чемпионатига шунча тайёргарлик кўриб, илк ўйиндан аввал шифохонада ётиш осон бўлмади. Бироқ бундай вазиятларда ҳам олдинга интилиш керак», — дея футболчининг сўзларини келтиради манба.
Маълумот учун, Мактоминей жаҳон чемпионатида Шотландиянинг учала учрашувида ҳам иштирок этган. Бироқ унинг жамоаси Гаити устидан қозонилган ғалабадан сўнг Марокаш ва Бразилияга мағлуб бўлиб, гуруҳ босқичидаёқ мусобақани тарк этган. Футболчи сентябрь ойида юрак ритми билан боғлиқ муаммони даволаш учун жарроҳлик амалиётини ҳам бошдан кечирган.
