Месси ва Роналдунинг ўрнини эгаллаши мумкин бўлган икки футболчи номи айтилди
Испания миллий терма жамоаси бош мураббийи Луис де ла Фуэнте Лионель Месси ва Криштиану Роналду халқаро фаолиятини якунлаганидан кейин жаҳон футболида кимлар етакчилик қилиши мумкинлиги ҳақида фикр билдирди. Мутахассис бу борада Килиан Мбаппе ва Ламин Ямалнинг имкониятларини алоҳида таъкидлади. Бу ҳақда EFE ахборот агентлиги хабар бермоқда.
Манбага кўра, Де ла Фуэнте Месси ва Роналдунинг футбол тарихидаги ўрнига юқори баҳо берган. Унинг фикрича, икки юлдуз нафақат майдондаги натижалари, балки кўп йиллар давомида ғалабага интилиши ва профессионал муносабати билан ҳам кўплаб футболчиларга намуна бўлган.
Испаниялик мураббий Мбаппе ва Ямал ҳақида гапирар экан, уларнинг келгуси йилларда жаҳон футболининг асосий юлдузларига айланишига ишонч билдирди. Шунингдек, у футбол учун ягона етакчи эмас, балки бир нечта кучли юлдузнинг ўзаро рақобатлашиши фойдали эканини таъкидлади.
Маълумот учун, 19 ёшли Ламин Ямал «Барселона» ва Испания терма жамоасининг асосий футболчиларидан бирига айланган. Килиан Мбаппе эса «Реал Мадрид» ва Франция терма жамоаси сафида фаолиятини давом эттирмоқда. Ҳар икки ҳужумчи янги футбол авлодининг энг машҳур вакиллари қаторидан жой олган.
