Роберт Уиттакер Богдан Гусковнинг энг хавфли жиҳатини айтди
UFCнинг собиқ чемпиони Роберт Уиттакер ўзбекистонлик Богдан Гусковга қарши бўлажак жанги олдидан рақибининг кучли томонлари ҳақида фикр билдирди. Австралиялик жангчи Гусковнинг зарба кучи ва жисмоний устунлиги жиддий хавф туғдиришини тан олди. Бу ҳақда MMA Junkie нашри хабар бермоқда.
Манбага кўра, Уиттакер 6 февраль куни Австралиянинг Сидней шаҳрида бўлиб ўтадиган UFC Fight Night турнирида Гусков билан тўқнаш келади. Собиқ чемпион ўзбекистонлик жангчини баланд бўйли, қўллари узун ва кучли зарбаларга эга рақиб сифатида таърифлаган. У ярим оғир вазндаги бундай жангчилардан зарба қабул қилиш жуда хавфли эканини таъкидлаган.
Уиттакернинг айтишича, UFC дастлаб унга бошқа рақибларни ҳам таклиф қилган, бироқ турли сабабларга кўра келишувга эришилмаган. Якунда Гусков жангга розилик билдирган. Австралиялик спортчи ўзбекистонлик рақибининг ушбу қарорини ҳурмат қилишини билдириб, мухлисларни қизиқарли тўқнашув кутаётганини таъкидлаган.
Маълумот учун, Роберт Уиттакер профессионал MMA фаолиятида 27 та ғалаба ва 9 та мағлубият қайд этган. Богдан Гусков ҳисобига эса 18 та ғалаба, 4 та мағлубият ва 1 та дуранг бор. Уларнинг беллашуви Сиднейда ўтадиган турнирнинг иккинчи асосий жанги сифатида белгиланган.
