Валерий Карпин: «Бугунги Ўзбекистон анча интизомли жамоага айланган»
Эртага «Пахтакор» стадионида бўлиб ўтадиган Ўзбекистон ҳамда Россия миллий жамоалари ўртасидаги ўртоқлик учрашувидан олдин бугун матбуот анжуманида ўтказилди. Унда Россия миллий жамоаси устози Валерий Карпин ва футболчи Константин Тюкавин қатнашишди.
- Бугунги ўйин олдидан кутилмаларингиз қандай?
Валерий Карпин: - Хайрли кеч. Кутилмалар ҳар доимгидек — миллий жамоанинг ҳар бир ўйинидан умидимиз катта. Жамоа сифатида шаклланганимизни, машғулотларда устида ишлаётган жиҳатларимиз майдонда ҳам кўринишини ва ўйинда ўз аксини топишини истаймиз.
Константин Тюкавин: - Бизнинг кутилмаларимиз ҳамиша бир хил: майдонга чиқиб, ўз вазифамизни бажариш, машғулотларда ўрганаётганларимизни ва мураббийлар штаби бизга ўргатаётган жиҳатларни кўрсатиш. Энг муҳими, яхши футбол намойиш этиш.
- Эртанги ўйинда Ўзбекистон сафида Ҳусановнинг ўйнай олмаслигини эшитгач, хафа бўлдингизми?
Тюкавин: - Йўқ, хафа бўлдим деб айтолмайман. Лекин, албатта, шундай кучли ҳимоячига қарши ўйнашни, ўз имкониятларимни ва унинг салоҳиятини синаб кўришни истагандим. Аммо тушунишимча, у эртанги ўйинда иштирок этмайди, шундайми? Афсус.
- Сиз Ўзбекистон миллий жамоасини Словения жамоасидан кучсизроқ деб ҳисоблайсизми? Агар шундай бўлса, 2022 йилда бизнинг жамоамиз билан ўйнашдан олдин Ўзбекистон ҳали ҳеч қаерда иштирок этмаган, кейин эса жаҳон чемпионати саралаши ва мундиалдаги дебютга эришди. Шундай ўзгаришлардан кейин ҳам нега бундай фикрдасиз? Ахир Словения ўша пайтда Европа чемпионати плей-оффида дуранг ўйнаган эди... Ўзбекистон ҳақидаги фикрингиз ҳали ҳам шундайми?
Карпин: - Эҳтимол, биз уларни анчадан бери кўрмаганмиз. Мен уларнинг ҳозирги ўйинларини кузатмадим, шунинг учун Словения билан таққослай олмайман. Ўшанда, 2021 йилда Словакия ва Словения билан ўйнаган эдик. Ҳозир эса улар билан анчадан бери тўқнаш келмадик. Шу боис айни пайтда қайси ҳолатда эканликларини билмайман. Аммо менимча, Ўзбекистон 2022 йилга нисбатан анча кучайган. Эҳтимол, ҳозир улар ўша пайтдагидан ҳам кучлироқдир.
- Ўзбекистонга хуш келибсиз! Саволим ҳазиломуз. Видеода сизга аёл киши тактик схемани чизиб берганини кўрдик. Эртанги ўйинда ҳам футболчиларни айнан шу тактика асосида майдонга туширасизми?
Яна бир илтимосим бор эди. Ҳозир сизга дўппи совға қилдим. Агар имкони бўлса, шу дўппини кийиб кўрсангиз.
Карпин: - Демак, роликдаги тактика ҳақида гап кетяптими? Дўппини албатта, кийиб кўришим мумкин. Тактикани ҳам қўллаймиз. Айни пайтда бизга етишмаётган тактикани назарда тутяпсиз, шекилли... Кейин эса... Антон Миранчук йўқ. Қолганига келсак, тактикани қўллаймиз. Кейин жавобини кўрасиз.
- Валерий Георгиевич, сиз Элдор Шомуродов билан Россияда бирга ишлагансиз. Кейин у Италияда муайян қийинчиликларга дуч келди. Ўтган мавсумда эса у ерда рақобат кучли бўлишига қарамай, яхши натижалар кўрсатди. Саволим шундай: сизнингча, бу унинг энг юқори даражасими ёки у бундан ҳам кўпроғига қодирми? У билан алоқада бўлиб турасизми? Фикрингиз билан ўртоқлашсангиз.
Карпин: - Унинг ҳозирги даражаси энг юқорисими ёки йўқми, бу борада аниқ фикр билдиришим қийин. Мен ҳам уни сизлар каби ташқаридан кузатяпман. Буни баҳолаш учун у билан кўпроқ вақт бирга ўтказишимиз, ҳеч бўлмаганда машғулотларда бирга ишлашимиз керак. У ҳозир кўрсатаётган ўйинига келсак, ўз салоҳиятини намоён қилди. Буни у «Ростов»даёқ кўрсатган эди. Шу билан бирга, Италияда ҳам яхши футбол мактабини ўтади. Шунинг учун ҳозир намойиш этаётган ўйини, биринчи навбатда, юқори савиядан далолат беради. Энг муҳими, у шу даражани камида сақлаб қолиши керак.
- Ўзбекистон миллий жамоасининг қайси кучли жиҳатларини алоҳида таъкидлаган бўлардингиз? Улардан қандай фойдаланишни режалаштиряпсиз?
Карпин: - Бу жиҳатлардан қандай фойдаланишимизни эртага ўйинда кўрамиз. Менимча, 2022 йилга нисбатан энг катта фарқ — бугунги Ўзбекистон миллий жамоаси анча интизомли жамоага айланган. Буни шундай таърифлаган бўлардим.
- Каннавародан ҳам сиз ҳақингизда сўрашган экан. У исмингизни айтмади, аммо жуда яхши футболчи бўлганингизни ва ҳозир ҳам яхши мураббий бўлишингизга умид қилишини билдирди. Унинг сизни исм-фамилиянгиз билан эслай олмагани сизга қандайдир таъсир қилдими?
Карпин: - Эслай олмаган бўлса, эслай олмабди. Ҳечқиси йўқ.
