Пэдди Пимблетт Илия Топурияни кескин танқид қилди
Британиялик UFC жангчиси Пэдди Пимблетт грузин-испаниялик спортчи Илия Топурияни кескин танқид қилди. У Топуриянинг бир нечта мамлакат мухлислари томонидан қўллаб-қувватланишга уринаётганини айтиб, Жастин Гэтжига қарши жангдаги мағлубиятидан сўнг унинг обрўсига путур етганини таъкидлади. Бу ҳақда Red Corner MMA хабар бермоқда.
Манбага кўра, Пимблетт Топуриянинг Грузия, Испания ва Германия билан боғлиқлигини тилга олиб, унинг турли мамлакатларда мухлислар орттиришга интилаётганини танқид қилган. Британиялик жангчи, шунингдек, Топуриянинг Испаниядаги мухлислари орасида ҳам унга нисбатан муносабат ўзгарганини даъво қилган.
”У грузинми, испанияликми ёки немисми? Биттасини танласин, бир вақтнинг ўзида учаласи ҳам бўла олмайди. Учта мамлакатдан мухлислар йиғишга уринишни бас қилсин. Эшитишимча, Испанияда ҳам ундан юз ўгиришган. Жастинга мағлуб бўлишидан олдин ҳам норозилик бор эди, мағлубиятдан кейин эса вазият янада ёмонлашди. Агар мен билан жанг қилиб, яна ютқазса, унда умуман мухлис қолмаслиги мумкин”, — деди Пимблетт.
Маълумот учун, Илия Топурия 2026 йил июнь ойида Жастин Гэтжига қарши ўтказилган жангда профессионал MMA фаолиятидаги илк мағлубиятини қабул қилган. Беллашув тўртинчи раунддан сўнг унинг жамоаси жангни тўхтатиши билан якунланган. Пэдди Пимблетт ҳам 2026 йил январь ойида Гэтжига қарши жанг ўтказиб, ҳакамлар қарори билан мағлуб бўлган.
