Юрист Усман Нурмагомедовни Абу-Дабидаги жанжал учун қандай жазо кутиши мумкинлигини тушунтирди
Россиялик юрист Алексей Гудас Абу-Дабида Мераб Двалишвили билан юзага келган жанжал сабаб Усман Нурмагомедов қандай жавобгарликка тортилиши мумкинлиги ҳақида фикр билдирди. Мутахассиснинг таъкидлашича, Бирлашган Араб Амирликлари қонунчилигида жамоат жойидаги муштлашув учун жиддий жазолар назарда тутилган.
Гудас мазкур воқеа иштирокчиларига БАА қонунчилиги бўйича ҳуқуқий чоралар қўлланиши мумкинлигини айтган. Юрист мамлакатнинг Жиноятлар ва жазолар тўғрисидаги федерал қонуни 390-моддасига ишора қилиб, жамоат тартибини бузиш билан боғлиқ ҳолатлар жиноий жавобгарликка сабаб бўлиши мумкинлигини таъкидлаган.
”Ҳодиса Абу-Дабида содир бўлганини ҳисобга олсак, жанжал иштирокчиларини жиддий оқибатлар кутиши мумкин. БАА қонунчилигига кўра, жамоат жойидаги муштлашув учун бир йилгача озодликдан маҳрум қилиш, тахминан 2700 доллар миқдорида жарима ёки мамлакатдан депортация қилиш каби чоралар қўлланиши мумкин. Жабрланган томон шикоят қилишдан бош тортган тақдирда ҳам кузатув камералари ёзувлари асосида текширув ўтказилиши мумкин”, — деди Гудас.
Маълумот учун, Усман Нурмагомедов ва UFCнинг собиқ чемпиони Мераб Двалишвили иштирокидаги жанжал 2026-йилнинг 11-ноябрида Абу-Дабидаги меҳмонхоналардан бирида юз берган. Воқеадан сўнг томонлар иштирокидаги видеолар ижтимоий тармоқларда тарқалган. Ҳозирча Нурмагомедовга нисбатан суд ҳукми чиқарилгани ёки муайян жазо тайинлангани расман тасдиқланмаган.
