Кристиан Киву: «Мхитарян жамоамиз учун жуда муҳим»
Италиянинг «Интер» клуби бош мураббийи Кристиан Киву Чемпионлар лигаси умумий босқичи 3-туридан ўрин олган Украинанинг «Шахтёр» жамоасига қарши ўйиндаги ғалаба (1:0) ҳақида фикр билдирди.
Учрашувнинг 68-дақиқасида «Интер» ҳимоячиси Алессандро Бастони қизил карточка олганидан сўнг миланликлар ўйинни бир киши кам бўлиб якунлашди.
«Агар кучли саккизликдан жой олишни истасак, хатоларга йўл қўймаслигимиз кераклигини тушуниб турибмиз. Иккинчи бўлимда амалга оширган ўзгаришларимиз жамоага қўшимча куч бағишлади.
Бизга ғалаба жуда зарур эди. Бу ғалабага эришиш усулимиз жамоага янада кўпроқ ишонч бағишлайди.
Мхитарян жамоамиз учун жуда муҳим. У бизга катта ёрдам бермоқда. Бу борада бошқа футболчиларни ҳам алоҳида таъкидлаш мумкин», — дея Кивунинг сўзларини УЕФА расмий сайти келтирмоқда.
