Капелло «Интер»ни кескин танқид қилди
Европа Чемпионлар лигаси умумий босқичининг 3-туридан ўрин олган учрашувда Миланнинг «Интер» клуби ўз майдонида «Шахтёр»ни 1:0 ҳисобида мағлуб этди. Машҳур мураббий Фабио Капелло учрашув ҳақида ўз фикрларини билдириб, «Интер»нинг ўйинини танқид қилди.
«“Интер” учрашувни жуда суст бошлади. Жамоа паст суръатда ўйнади ва рақибга босим ўтказмади. Биринчи бўлимда дарвоза томон атиги бир марта аниқ зарба йўллади. Майдонда 60-дақиқагача ланж ҳаракат қилган, кучсиз “Интер”ни кўрдим.
Уларни доимо учинчи узатмада ҳаракатланадиган, фақат ўйин охиридагина бешинчи узатмага ўтадиган машинага қиёслаш мумкин», — дея Капеллонинг сўзларини келтирмоқда La Gazzetta dello Sport нашри.
Эслатиб ўтамиз, «Интер» ҳимоячи Алессандро Бастонининг майдондан четлатилишидан кейин ўйинни 10 киши бўлиб давом эттирганига қарамай, ғалабани қўлга киритди.
