Ispaniya hakamlar qo‘mitasi VAR tizimidagi texnik xatoni tan oldi
Испания футбол федерацияси ҳакамлар қўмитаси «Атлетик Бильбао» ва «Реал Сосьедад» ўртасидаги учрашувда VAR технологияси билан боғлиқ техник носозлик юз берганини тасдиқлади. Мазкур хатолик учрашув давомида белгиланган пенальти қарорига таъсир қилган бўлиши мумкин. Бу ҳақда Испания футбол федерацияси (RFEF) расмий сайти хабар бермоқда.
Манбага кўра, баҳс давомида «Атлетик Бильбао» футболчиси Нико Уильямс иштирокидаги вазият учун пенальти белгиланган. VAR ҳакамлари тўп ичига ўрнатилган сенсор маълумотлари асосида қарорни текширган. Бироқ учрашувдан кейинги таҳлиллар сенсор сигналлари билан видеотасвирлар ўртасида кичик номувофиқлик бўлганини кўрсатган.
Технология ишлаб чиқарувчиси Kinexon томонидан ўтказилган текширувда сигнал ва тасвир ўртасида 20–40 миллисекундлик фарқ аниқланган. Натижада «Реал Сосьедад» ҳимоячиси Жон Арамбурунинг тўпга тегиши дастлаб нотўғри талқин қилинган бўлиши мумкин. Қайта синхронлаштирилган тасвирлар эса пенальти белгилаш ҳақидаги қарор хато бўлган бўлиши мумкинлигини кўрсатган.
Маълумот учун, Испания футбол федерацияси хатолик тўп сенсорининг ўзида эмас, балки унинг маълумотларини VAR видеотасвирлари билан мослаштириш жараёнида юз берганини таъкидлаган. Федерация учрашув вақтида ҳакамлар ихтиёрида мавжуд маълумотлар асосида қарор қабул қилинганини билдирган. Эндиликда шунга ўхшаш ҳолатларнинг олдини олиш учун технологиядан фойдаланиш тартибини такомиллаштириш режалаштирилмоқда.
