“Manchester Yunayted” Maykl Kerrik bilan xayrlashish masalasini ko‘rib chiqmoqda
“Manchester Yunayted” rahbariyati bosh murabbiy Maykl Kerrikning kelajagi yuzasidan yakuniy qaror qabul qilmagan. Angliyalik mutaxassisning qoniqarsiz natijalari klubni murabbiylar shtabida o‘zgarish qilish imkoniyatini ko‘rib chiqishga undamoqda. Bu haqda Sky Sports nashri xabar bermoqda.
Manbaga ko‘ra, agar “Manchester Yunayted” Kerrikni iste’foga chiqarsa, klub yana vaqtinchalik murabbiy tayinlashni rejalashtirmayapti. Rahbariyat jamoani uzoq muddat boshqara oladigan mutaxassis bilan hamkorlik qilish tarafdori. Shu bilan birga, Kerrik klub rahbarlarining ayrim vakillari tomonidan qo‘llab-quvvatlanmoqda.
“Roma” ustidan qo‘lga kiritilgan g‘alaba murabbiyning mavqeini biroz mustahkamlagan bo‘lsa-da, bu natija barcha muammolar hal bo‘lganini anglatmaydi. Jamoa Angliya Premer-ligasida 17-o‘rinda bormoqda va xavfli hududdan faqat to‘plar nisbatiga ko‘ra yuqorida turibdi. Rahbariyat noyabrdagi xalqaro tanaffus vaqtida vaziyatni yana bir bor baholashi kutilmoqda.
Ma’lumot uchun, Maykl Kerrik 2026-yil may oyida “Manchester Yunayted” bosh murabbiyi etib tayinlangan. Dastlab vaqtinchalik murabbiy sifatida muvaffaqiyatli ishlagan mutaxassis klub bilan ikki yillik shartnoma imzolagandi. Uning boshqaruvidagi jamoa so‘nggi o‘nta uchrashuvda faqat bir marta g‘alaba qozongan.
