“Manchester Siti” quyi ligaga tushsa, Holand “Barselona”ga o‘tadi - manba
“Manchester Yunayted”ning sobiq yarim himoyachisi Pol Skoulz “Manchester Siti” hujumchisi Erling Holandning kelajagi haqida fikr bildirdi. Ingliz futboli afsonasining taxminicha, agar “Siti” moliyaviy qoidabuzarliklar sabab Angliya Premyer-ligasidan chetlatilsa, norvegiyalik hujumchi faoliyatini “Barselona”da davom ettirishi mumkin.
Skoulz bu fikrni “The Good, The Bad & The Football” podkastidagi suhbat davomida aytgan. Undan “Manchester Siti” quyi ligaga tushirilgan taqdirda Holand qaysi klubni tanlashi mumkinligi so‘ralgan. Sobiq futbolchi esa hujumchining kelajagini Ispaniya chempionati bilan bog‘lagan.
“Barselona”. Aslida u “Real Madrid” futbolchisiga o‘xshaydi. Uni “Real Madrid” libosida bemalol tasavvur qila olaman. Lekin menimcha, u “Barselona”ga boradi”, — dedi Skoulz.
Ma’lumot uchun, Holand 2025-yil yanvarida “Manchester Siti” bilan uzoq muddatli shartnoma imzolagan. Amaldagi kelishuv 2034-yilning yozigacha mo‘ljallangan. Hozircha futbolchining klubni tark etishi yoki “Barselona” bilan muzokara olib borayotgani haqida tasdiqlangan ma’lumot yo‘q. Skoulzning bayonoti faqat ehtimoliy vaziyatga oid shaxsiy taxmin hisoblanadi.
