“Bavariya” Vinsent Kompanining sog‘lig‘i haqida yangi ma’lumot berdi
Myunxenning “Bavariya” klubi 23-oktabr kuni mashg‘ulot vaqtida hushidan ketgan bosh murabbiy Vinsent Kompanining sog‘lig‘i yuzasidan yangi ma’lumot berdi. Klub sport direktori Maks Eberl belgiyalik mutaxassisning ahvoli barqaror ekanini, biroq u yana bir necha kun shifoxonada qolishini ma’lum qildi. Bu haqda Germaniyaning Sport Bild nashri xabar bermoqda.
Manbaga ko‘ra, Eberl 24-oktabr kuni “Frayburg”ga qarshi Bundesliga uchrashuvidan oldin o‘tkazilgan matbuot anjumanida Kompanining holatiga izoh bergan. Uning ta’kidlashicha, murabbiyning ahvoli hozirda barqaror bo‘lib, shifokorlar hushidan ketish sabablarini aniqlash maqsadida tibbiy tekshiruvlarni davom ettirmoqda. Mutaxassisning aynan qanday kasallikka duch kelgani hozircha ma’lum emas.
“Bavariya” rahbariyati Kompanining sog‘lig‘i klub uchun eng muhim masala ekanini ta’kidlamoqda. Belgiyalik murabbiy jamoa ixtiyoriga faqat to‘liq sog‘ayganidan keyin qaytadi. Uning yo‘qligida asosiy jamoa mashg‘ulotlari va uchrashuvlarga tayyorgarlik jarayonini yordamchi murabbiy Aaron Denks boshqaradi. Mutaxassis Kompani bilan suhbatlashganini va unga futbol masalalaridan ko‘ra sog‘lig‘iga e’tibor qaratish zarurligini aytgan.
Ma’lumot uchun, 40 yoshli Vinsent Kompani 23-oktabr kuni “Bavariya”ning zaxira jamoasi mashg‘ulotini kuzatayotgan vaqtda hushidan ketgan edi. Myunxenliklarning navbatdagi uchrashuvi 25-oktabr kuni “Frayburg”ga qarshi bo‘lib o‘tadi. Kompani mazkur bahsda murabbiylik vazifasini bajara olmaydi.
