Улуғбек Боқоев: «Ҳеч ким бундай бурилишни кутмаганди»
Бугун Суперлиганинг 27-туридан битта ўйин ўрин олган бўлиб, унда «Сўғдиёна» ва «Динамо» клублари беллашишди.
Аслида ўйин мезбонлар учун яхши бошлангандди, тезкор гол уриб ҳисобни очишганди. Бироқ 30-дақиқада жиззахликлар футболчисининг майдондан четлатилганидан кейин ўйин суръати ўзгарди. Якунда эса таблодаги ҳисоб 1:3 кўринишида порлаб турди ва «Динамо» меҳмонда муҳим уч очкони қўлга киритди.
Ўйиндан кейин жиззахликлар устози Улуғбек Боқоев матбуот анжуманида қуйидагиларни айтди:
- Нима ҳам дердим, ўйинни яхши, фаол ва агрессив тарзда бошладик. Тезкор гол урдик, яна бир нечта гол уришимиз ҳам мумкин эди. Аммо қизил карточкага сабаб бўлган қўпол хато бутун ўйин боришини ўзгартириб юборди.
Ҳеч ким бундай бурилишни кутмаган эди. Бироқ Самарқанд жамоаси сон жиҳатидан устунликка эришгач, гол урди ва якунда 3:1 ҳисобида ғалаба қозонди.
Бу борада йигитларга ҳеч қандай эътирозим йўқ. Ҳар ким хато қилиши мумкин, бу футбол. Шунинг учун олдинга қараб, тайёргарликни давом эттиришимиз керак», - дея Боқоевнинг сўзларини келтиради Tribuna.uz мухбири.
