Португалия терма жамоасининг собиқ футболчиси Пепе Испания Кубоги финали бўйича прогнози билан ўртоқлашди
Мадриднинг «Реал» жамоаси ва Португалия термаси собиқ ҳимоячиси Пепе Испания Кубоги финали ҳақида ўз фикрини билдирди. Финал 26 апрел куни бўлиб ўтади, учрашув Тошкент вақти билан соат 01:00 да бошланади. Унда «Реал Мадрид» ва «Барселона» тўқнаш келади.
Mundo Deportivo нашри хабарига кўра, Пепе қуйидагиларни айтди: «Мадрид ғалаба қозонишига умид қиламан. Аммо бу осон кечмайди. Менинг прогнозим — 2:0 „Реал“ фойдасига. Голлар муаллифи — Валверде ва Рюдигер».
Айни пайтда Ла Лигада «Барселона» 33 турдан сўнг 76 очко билан пешқадам. «Реал» 4 очкога орқада. Иккала клуб ҳам сўнгги уч учрашувда ғалаба қозонди:
«Реал» — «Алавес»ни (1:0, сафарда), «Атлетик»ни (1:0, уйда) ва «Хетафе»ни (1:0, сафарда) мағлуб этди;
«Барселона» — «Леганес» (1:0, сафарда), «Селта» (4:3, уйда) ва «Малорка» (1:0, уйда) устидан зафар қучди.
