Португалия Криштиану Роналду учун махсус хайрлашув маросими ўтказмоқчи
Португалия футбол федерацияси миллий терма жамоадаги фаолиятини якунлаган Криштиану Роналду шарафига махсус хайрлашув маросими ташкил этишни режалаштирмоқда. Федерация 41 ёшли ҳужумчининг мамлакат футболи ривожига қўшган ҳиссасини муносиб тақдирлаш ниятида эканини маълум қилди. Бу ҳақда Португалия футбол федерацияси расмий баёнотида хабар бермоқда.
Манбага кўра, федерация Роналдунинг терма жамоадаги фаолиятига юқори баҳо бериб, унинг ютуқларини алоҳида эътироф этган. «Биз Криштиану Роналдунинг буюк фаолиятига муносиб ҳурмат кўрсатадиган тадбирни ташкил этиш ниятидамиз. Ушбу маросимда мухлислар ва бутун мамлакат Португалия футболига беқиёс ҳисса қўшган футболчини яна бир бор олқишлаш ва унга миннатдорлик билдириш имкониятига эга бўлади», — дейилади баёнотда.
Федерация Роналдуни миллий жамоанинг энг муҳим етакчиларидан бири сифатида таърифлаб, унинг фидойилиги ва эришган натижалари келажак авлод учун намуна бўлиб қолишини таъкидлаган. Шунингдек, португалиялик ҳужумчига миннатдорлик билдирилиб, терма жамоа унинг учун доимо очиқ экани қайд этилган. Ҳозирча хайрлашув маросимининг санаси, ўтказилиш жойи ва формати маълум қилинмаган. Тадбир махсус учрашув ёки бошқа шаклда ташкил этилиши мумкин.
Маълумот учун, Криштиану Роналду 2003 йилда Португалия терма жамоасида дебют қилган. У миллий жамоа сафида 234 та учрашув ўтказиб, 146 та гол урган ва ҳар икки кўрсаткич бўйича жаҳон рекордини ўрнатган. Шунингдек, Португалия билан 2016 йилги Европа чемпионати ҳамда 2019 ва 2025 йиллардаги УЕФА Миллатлар лигаси ғолибига айланган.
