Ҳарри Кейн Европанинг энг кўп маош оладиган футболчисига айланди
«Бавария» ҳужумчиси Ҳарри Кейн Мюнхен клуби билан шартномасини узайтирганидан сўнг Европанинг энг юқори маош оладиган футболчисига айланди. 33 ёшли англияликнинг янги келишуви 2029 йилнинг ёзига қадар амал қилади. Мазкур битим «Бавария» тарихидаги энг қиммат шартнома сифатида баҳоланмоқда. Бу ҳақда The Athletic нашри хабар бермоқда.
Манбага кўра, Кейн янги келишув асосида Европадаги энг юқори кафолатланган маошга эга футболчига айланган. Бунда қўшимча мукофот пуллари ҳисобга олинмаган. Айрим юлдузларнинг бонуслар билан биргаликдаги умумий даромади англиялик ҳужумчиникидан юқори бўлиши мумкин. Шартноманинг аниқ молиявий тафсилотлари ошкор этилмаган.
«Бавария» раҳбарияти Кейн билан узоқ муддатли ҳамкорликни давом эттиришни мақсад қилган. Клуб ушбу шартномани футболчининг Мюнхендаги сўнгги келишуви деб ҳисобламаяпти. Ҳужумчининг ўзи ҳам янги битимдан мамнунлигини билдириб, «Бавария»да ўзини уйидагидек ҳис қилаётганини ва жамоа билан яна кўплаб совринларни қўлга киритишни исташини таъкидлаган.
Маълумот учун, Ҳарри Кейн 2023 йилда «Тоттенҳэм»дан «Бавария»га трансфер қилинган. У Мюнхен клуби сафида 161 та расмий учрашув ўтказиб, 156 та гол урган ва 40 та голли узатмани амалга оширган. Англиялик футболчи «Бавария» билан икки марта Германия чемпионлигини қўлга киритган ҳамда 2026 йилда фаолиятидаги илк «Олтин тўп» мукофотига сазовор бўлган.
