Неймар Роналдунинг хайрлашувига бир сўз билан муносабат билдирди
Бразилиялик ҳужумчи Неймар Криштиану Роналдунинг Португалия терма жамоасидаги фаолиятини якунлаш ҳақидаги қарорига муносабат билдирди. 34 ёшли футболчи португалиялик юлдузнинг Instagram саҳифасида эълон қилган хайрлашув видеомурожаатига изоҳ қолдирди. Бу ҳақда Бразилиянинг UOL нашри хабар бермоқда.
Манбага кўра, Неймар Роналдунинг постига “Легенда” (“Афсона”) деб ёзган ва қарсак чалаётган қўллар эмодзисини қўшган. Шу тариқа, бразилиялик футболчи кўп йиллар давомида майдонда рақиб бўлган португалиялик ҳужумчига ҳурматини билдирди.
Роналдунинг қарорига бошқа таниқли футболчилар ҳам муносабат билдирган. Жумладан, “Реал Мадрид” ҳужумчиси Винисиус Жуниор “Сен ҳамиша биринчи рақамсан”, деб ёзган. Португалия терма жамоасининг собиқ ҳимоячиси Пепе эса “Бу футболдан ҳам кўпроқ нарса эди. Ҳаммаси учун раҳмат, Крис”, дея собиқ жамоадошига миннатдорлик билдирган. Шунингдек, “Манчестер Юнайтед”, “Ювентус” ва FIFA ҳам Роналдунинг халқаро фаолиятига бағишланган хабарлар эълон қилган.
Маълумот учун, Криштиану Роналду 2003 йилда Португалия терма жамоасида дебют қилган. У миллий жамоа сафида 234 та учрашув ўтказиб, 146 та гол урган ва ҳар икки кўрсаткич бўйича жаҳон рекордини ўрнатган. Шунингдек, Португалия билан 2016 йилги Европа чемпионати ҳамда 2019 ва 2025 йиллардаги UEFA Миллатлар лигаси ғолибига айланган.
