“Барселона” Рафинья билан шартномани 2030-йилгача узайтиришини эълон қилди
Испаниянинг “Барселона” клуби бразилиялик ҳужумчи Рафинья билан янги шартнома бўйича келишувга эришди. 29 ёшли футболчининг каталонияликлар билан амалдаги битими 2030 йилнинг 30 июнига қадар узайтирилади. Бу ҳақда “Барселона” клубининг расмий сайти хабар бермоқда.
Манбага кўра, янги келишувни имзолаш маросими клуб президенти Жоан Лапорта иштирокида ўтказилиши белгиланган. Шартнома расмийлаштирилгач, бразилиялик футболчи ОАВ вакилларининг саволларига жавоб беради. Шу тариқа, Рафинья яна камида уч ярим мавсум давомида каталонияликлар шаънини ҳимоя қилади.
Клуб раҳбарияти янги келишувни ҳужумчининг жорий мавсумдаги юқори натижалари билан изоҳлаган. Рафинья 2026/27 йилги мавсумда барча мусобақаларда 19 та гол уришга муваффақ бўлган. Шулардан 15 таси Испания чемпионати, қолган тўрттаси эса Чемпионлар лигаси баҳсларига тўғри келади. Бразилиялик футболчи айни пайтда жамоанинг асосий етакчиларидан бири ҳисобланади.
Маълумот учун, Рафинья 2022 йилда Англиянинг “Лидс” клубидан “Барселона”га трансфер қилинган. У каталонияликлар сафида 190 та учрашув ўтказиб, 94 та гол урган. Шу тариқа, ҳужумчи клуб тарихида энг кўп ўйин ўтказган ва энг кўп гол урган бразилиялик футболчилар орасида тўртинчи ўринни эгаллаб турибди.
