Криштиану Роналду Португалия терма жамоасидаги фаолиятини якунлади
Португалия футболи тарихидаги энг ёрқин саҳифалардан бири якунига етди. Афсонавий ҳужумчи Криштиану Роналду 41 ёшида миллий терма жамоадаги фаолиятини тугатганини расман эълон қилди. Футболчи бу қарорини Instagram саҳифасида эълон қилган видеомурожаати орқали маълум қилди. Бу ҳақда Португалиянинг Diário de Notícias нашри хабар бермоқда.
Манбага кўра, Роналду мухлисларга йўллаган хайрлашув мурожаатида “Португалия ҳамиша қалбимда қолади”, дея таъкидлаган. Шу тариқа, унинг 23 йилдан ортиқ давом этган терма жамоадаги фаолияти ўз ниҳоясига етди. Португалиялик юлдуз миллий жамоа сафида кўплаб тарихий натижаларга эришиб, мамлакат футболининг асосий тимсолларидан бирига айланганди.
Роналдунинг бу қарори сўнгги ҳафталарда терма жамоа атрофида юзага келган келишмовчиликлардан кейин эълон қилинди. Сентябрь ойида бош мураббий Жорже Жезуш билан зиддиятга борган футболчи миллий жамоа қароргоҳини тарк этган ва кейинчалик 30 кунга четлатилган эди. Октябрь ойида Роналду терма жамоага қайтишга тайёрлигини билдирган бўлса-да, энди халқаро фаолиятини якунлашга қарор қилди.
Маълумот учун, Криштиану Роналду 2003 йилда Португалия терма жамоасида дебют қилган. У миллий жамоа сафида 234 та учрашув ўтказиб, 146 та гол урган ва ҳар икки кўрсаткич бўйича жаҳон рекордини ўрнатган. Шунингдек, Роналду Португалия билан 2016 йилги Европа чемпионати ҳамда 2019 ва 2025 йиллардаги УЕФА Миллатлар лигаси ғолибига айланган.
