Криштиану Роналду: «Бу қарорга келиш осон бўлмади»
Португалия терма жамоасидаги фаолиятини якунлашга қарор қилган Криштиану Роналду мухлисларга хайрлашув мурожаати йўллади. 41 ёшли ҳужумчи Instagram саҳифасида эълон қилган видеода ушбу қарорнинг сабаблари, миллий жамоада ўтказган йиллари ва фаолияти давомида бошидан кечирган воқеалар ҳақида гапирди. Бу ҳақда Бразилиянинг UOL нашри хабар бермоқда.
Манбага кўра, Роналду терма жамоа билан хайрлашиш ўзи учун осон бўлмаганини таъкидлаган. «Бу қарорга келиш осон бўлмади. Чунки айрим қарорлар нафақат ақл, балки қалб билан ҳам қабул қилинади», — деган португалиялик футболчи. У 2003 йилда бошланган халқаро фаолияти ҳаётини бутунлай ўзгартирганини ҳам қайд этган.
Роналду мурожаати давомида терма жамоа сафидаги ғалабалари, мағлубиятлари ва эришган ютуқларини ёдга олган. «Португалия учун бор кучимни бердим», — деган ҳужумчи фаолияти давомида хатоларга йўл қўйгани, қийинчиликларга дуч келгани, аммо ҳеч қачон таслим бўлмаганини таъкидлаган. Шунингдек, у жамоадошлари, мураббийлари, яқинлари ва мухлисларга миннатдорлик билдириб, бундан кейин ҳам Португалия терма жамоасини қўллаб-қувватлашини маълум қилган.
Маълумот учун, Криштиану Роналду 2003 йилда Португалия терма жамоасида дебют қилган. У миллий жамоа сафида 234 та учрашув ўтказиб, 146 та гол урган ва ҳар икки кўрсаткич бўйича жаҳон рекордини ўрнатган. Шунингдек, Португалия билан 2016 йилги Европа чемпионати ҳамда 2019 ва 2025 йиллардаги UEFA Миллатлар лигаси ғолибига айланган.
