Икер Касильяс ўғилларини “Реал Мадрид” академиясидан олиб кетишга қарор қилди
Мадриднинг “Реал” клуби собиқ дарвозабони Икер Касильяс икки ўғлини жамоа академиясидан олиб кетишга қарор қилди. Бунга катта ўғли, 12 ёшли Мартиннинг ўйин амалиёти камайгани сабаб бўлган. Бу ҳақда Испаниянинг AS нашри хабар бермоқда.
Манбага кўра, 12 ёшли Мартин ва унинг 10 ёшли укаси Лукас “Реал Мадрид”нинг “Ла Фабрика” академиясидаги фаолиятини якунлаш арафасида. Отаси сингари дарвозабон сифатида шуғулланаётган Мартин сўнгги вақтларда ўз ёш тоифасидаги асосий таркибдан четда қолган. Унинг АҚШнинг Орландо шаҳрида ўтказилган халқаро турнирга чақирилмагани ҳам қарорга таъсир кўрсатган.
Касильяснинг кичик ўғли Лукас эса академиянинг “Алевин А” жамоасида ўйнаб келган. У яқинда “Барселона”га қарши учрашувда пенальтиларни қайтариб, эътиборга тушган эди. Шунга қарамай, ака-ука фаолиятини бошқа клубда давом эттиришни маъқул кўрган. “Реал” раҳбарияти уларнинг қароридан хабардор.
Маълумот учун, Икер Касильяс 1999–2015-йиллар давомида “Реал Мадрид” шарафини ҳимоя қилган. У клуб билан беш марта Испания чемпионлиги ва уч марта Чемпионлар лигаси совринини қўлга киритган. Шунингдек, Испания терма жамоаси сафида 2010-йилги жаҳон чемпионатида ғолиб бўлган.
