“Барселона” иккинчи, “Манчестер Юнайтед” саккизинчи: дунёнинг энг кўп даромад оладиган футбол клуби маълум бўлди
Дунёнинг энг кўп даромад оладиган футбол клублари рейтингида Мадриднинг “Реал” жамоаси етакчиликни сақлаб қолди. “Қироллик клуби”нинг йиллик даромади 1,16 миллиард еврони ташкил этди. Бу ҳақда Deloitte компаниясининг “Football Money League 2026” ҳисоботида маълум қилинган.
Манбага кўра, рейтингнинг иккинчи поғонасини 975 миллион евро билан “Барселона” эгаллаган. Кучли учликни 861 миллион евро даромад билан Мюнхеннинг “Бавария” клуби якунлаган. Кейинги ўринлардан ПСЖ (837 миллион) ва “Ливерпуль” (836 миллион) жой олган.
Олтинчи ўринни 829 миллион евро даромад билан “Манчестер Сити” банд этган. “Арсенал” 822 миллион евро билан еттинчи, “Манчестер Юнайтед” эса 793 миллион евро билан саккизинчи поғонадан жой олган. Кучли ўнликни “Тоттенҳем” (673 миллион) ва “Челси” (584 миллион) якунлаган.
Маълумот учун, рейтинг клубларнинг 2024/25-йилги мавсумдаги молиявий кўрсаткичлари асосида тузилган. Дунёнинг энг кўп даромад оладиган 20 та футбол клуби ушбу даврда жами 12,4 миллиард евро ишлаб топган. Бу аввалги мавсумга нисбатан 11 фоизга кўп.
