FIFA Қитъалараро кубоги финали Қатарда бўлиб ўтади
FIFA 2026 йилги Қитъалараро кубок мусобақасининг ҳал қилувчи учта учрашуви Қатарда ўтказилишини расман эълон қилди. Унга кўра, турнирнинг якуний баҳслари 9, 12 ва 16 декабрь кунларига белгиланган. Мусобақанинг финал учрашуви 16 декабрь куни Ал-Райён шаҳридаги “Аҳмад бин Али” стадионида бўлиб ўтади. Бу ҳақда FIFA расмий сайти хабар бермоқда.
Манбага кўра, 9 декабрь куни “Жассим бин Ҳамад” стадионида FIFA Derby of the Americas учрашуви ташкил этилади. Орадан уч кун ўтиб, 12 декабрь куни айни стадионда FIFA Challenger Cup баҳси бўлиб ўтади. Ушбу ўйинда ғалаба қозонган жамоа Қитъалараро кубок финалига йўлланма олади.
Ҳал қилувчи учрашувда Европанинг амалдаги чемпиони ва мусобақанинг сўнгги ғолиби — Франциянинг “Пари Сен-Жермен” клуби иштирок этади. Парижликлар финалга тўғридан-тўғри йўлланма олган бўлиб, уларнинг рақиби 12 декабрь кунги FIFA Challenger Cup баҳсидан кейин аниқланади.
Маълумот учун, Қатар FIFA Қитъалараро кубогининг ҳал қилувчи учрашувларига кетма-кет учинчи йил мезбонлик қилмоқда. Мусобақада FIFAга аъзо олтита қитъа конфедерациясининг чемпионлари қатнашади. 2024 йилда бош совринни “Реал Мадрид” қўлга киритган бўлса, 2025 йилда “Пари Сен-Жермен” чемпион бўлган.
