Винисиус Жуниор “Реал Мадрид”да жиддий ўйин инқирозини бошдан кечирмоқда
“Реал Мадрид”нинг бразилиялик ҳужумчиси Винисиус Жуниор 2026/27-йилги мавсумда кутилган натижаларни намойиш эта олмаяпти. Футболчининг ўйиндаги фаоллиги ва самарадорлиги пасайгани Испания матбуотида кенг муҳокама қилинмоқда. Бу ҳақда Cadena SER радиоси хабар бермоқда.
Манбага кўра, Винисиус жорий мавсумда ҳозирча атиги битта гол урган. У жамоанинг энг кўп голли узатма берган футболчиси бўлишига қарамай, 12-сентябрдан буён бирорта ҳам ассист қайд этмаган. Шунингдек, бразилиялик футболчи сўнгги икки учрашувда рақибларини алдаб ўтишга бирор марта ҳам уринмаган.
Испаниялик таҳлилчиларнинг фикрича, ушбу кўрсаткичлар Винисиуснинг ўзига бўлган ишончи пасайганидан далолат бериши мумкин. Вазиятни унинг интизомий жазоси янада мураккаблаштирган. Футболчи “Вильярреал”га қарши учрашувда рақибининг сочидан тортгани учун майдондан четлатилган ва тўртта ўйинга дисквалификация қилинган.
Маълумот учун, Винисиус 25-октябрь куни “Барселона”га қарши ўтказиладиган “Эл-Класико”да ҳам иштирок эта олмайди. Бразилиялик футболчининг йўқлиги Мадрид жамоасининг ҳужум чизиғидаги имкониятларига таъсир қилиши мумкин.
