Осиё футбол конфедерацияси Жанни Инфантинони қўллаб-қувватлашини эълон қилди
Осиё футбол конфедерацияси — ОФК президенти Шайх Салмон бин Иброҳим ал-Халифа ФИФА раҳбари Жанни Инфантинонинг навбатдаги президентлик сайловидаги номзодини қўллаб-қувватлашини билдирди. Баёнот Япониянинг Токио шаҳрида ўтказилган ОФК фавқулодда конгрессида янгради. Бу ҳақда Reuters ахборот агентлиги хабар бермоқда.
Манбага кўра, Шайх Салмон конгрессда иштирок этган Инфантиниога мурожаат қилиб, Осиё футболи унинг раҳбарлигини қўллаб-қувватлашини таъкидлаган. ОФК раҳбари Инфантинонинг сўнгги йилларда қитъа мамлакатларига ташрифлари ва Осиё футболи ривожига қаратилган фаолиятини алоҳида тилга олган.
Ушбу баёнот икки ташкилот ўртасида аввал юзага келган келишмовчиликлардан кейин эълон қилинди. Хусусан, ОФК жорий йилнинг август ойида УЕФА ва КОНКАКАФ билан биргаликда ФИФАнинг йирик мусобақаларга хусусий инвесторларни жалб қилиш режасини танқид қилган эди. Шунга қарамай, Осиё конфедерацияси президентлик сайловида Инфантино номзодини қўллаб-қувватлашини маълум қилди.
Маълумот учун, Жанни Инфантино 2016 йилдан буён ФИФА президенти лавозимида ишлаб келмоқда. У 2027 йилнинг март ойида бўлиб ўтадиган сайловда яна президентлик учун курашиши кутилмоқда. Сайлов натижасида унинг ваколат муддати 2031 йилгача узайтирилиши мумкин.
