“Арсенал” январда Алекс Баэнани сотиб олмоқчи
Лондоннинг “Арсенал” клуби қишки трансфер ойнасида “Атлетико Мадрид”нинг испаниялик футболчиси Алекс Баэнани ўз сафига қўшиб олиш имкониятини кўриб чиқмоқда. Лондонликлар ҳужум чизиғини кучайтириш мақсадида 25 ёшли футболчига қизиқиш билдирмоқда. Бу ҳақда FootballTransfers нашри хабар бермоқда.
Манбага кўра, “Арсенал” раҳбарияти Баэнани январь ойидаги трансферлар учун асосий номзодлардан бири сифатида белгилаган. Лондон клуби 2024 йилда ҳам футболчини кузатган, бироқ ўша пайтда трансфер амалга ошмаган. Энди Микел Артета бошқарувидаги жамоа унинг номзодига яна қайтган.
Баэна жорий мавсумда “Атлетико” сафида ёрқин ўйин намойиш этмоқда. Испаниялик футболчи барча мусобақаларда бешта гол ва учта голли узатма муаллифи бўлган. У қанот ҳужумчиси, ҳужумкор ярим ҳимоячи ва зарурат туғилганда ҳужум марказида ҳам ҳаракатлана олади. Бу эса футболчининг “Арсенал” учун жозибадорлигини оширмоқда.
Маълумот учун, FootballTransfers портали Баэнанинг тахминий трансфер қийматини 42,6 миллион евро деб баҳоламоқда. Бироқ “Атлетико Мадрид” унинг жамоа учун муҳим футболчи эканини инобатга олиб, айниқса қишки трансфер ойнасида бундан анча юқори маблағ талаб қилиши мумкин. Ҳозирча клублар ўртасида келишувга эришилгани ҳақида расмий маълумот йўқ.
