Александр Хомяков: «Ҳаммаси яхши кетаётганди»
Суперлига 12-туридан ўрин олган «Нефтчи» – «Бухоро» (2:1) учрашувидан кейинги матбуот анжуманида меҳмонлар бош мураббийи Александр Хомяков иштирок этди.
«Аввало барчани мавсумнинг иккинчи ярми старт олгани билан табриклайман. Ўйлайманки, ҳаммамиз ўзимизга хос футболни соғиниб қолгандик. Ўйин ҳақида тўхталадиган бўлсам, амалдаги чемпионга қарши кураш олиб бордик ва жиддий қаршилик кўрсатишга ҳаракат қилдик.
Ҳаммаси яхши кетаётганди, бироқ баҳс охирларида гол ўтказиб, мағлубиятга учрадик. Эътиборни ҳимояга қаратдик ва бу тушунарли эди. Лекин футболда 90 дақиқа ҳимояланиш осон эмас. Бугун биз шундан азият чекдик. Айтиб ўтганимдек, чемпионга қарши баҳс олиб бордик, омадимиз келмади. Яна нима ҳам дердим, "Нефтчи"ни ғалаба билан табриклайман. Биз энди кейинги ўйинга тайёргарлик кўрамиз», — деди мутахассис.
