Пол Галлен даҳшатли нокаутдан кейин профессионал боксдаги фаолиятини якунлади
Австралиялик собиқ регби юлдузи ва профессионал бокcчи Пол Галлен Нелсон Асофа-Соломонага қарши жангдаги оғир мағлубиятдан сўнг спортдаги фаолиятини якунлашга қарор қилди. 45 ёшли спортчи биринчи раундда нокаутга учрагач, шифохонага олиб кетилган эди. Кейинчалик у ўз аҳволи ҳақида маълумот бериб, бошқа профессионал жанг ўтказмаслигини тасдиқлади. Бу ҳақда Nine нашри хабар бермоқда.
Манбага кўра, Асофа-Соломона жангнинг дастлабки раундидаёқ ташаббусни қўлга олган. Кучли ўнг қўл зарбасидан сўнг Галлен мувозанатини йўқотган, кейинчалик эса рақибининг кетма-кет апперкотлари натижасида нокаутга учраган. Вазият шу қадар оғир бўлганки, жангдан кейин собиқ регбичининг соғлиғи мухлислар ва мутахассислар орасида хавотир уйғотган. У дастлаб кийиниш хонасида яқинлари билан суҳбатлашган, сўнгра тиббий текширув учун шифохонага олиб борилган.
Галлен Instagram орқали мурожаат қилиб, ҳозир уйида эканини ва соғлиғида жиддий муаммо йўқлигини маълум қилди. У ёш ўтиши билан бокcчининг зарбаларга чидамлилиги пасайишини тан олди. Спортчи рақибининг ғалабасини муносиб баҳолаб, унга эътирози йўқлигини таъкидлади. Шунингдек, сўнгги йилларда у билан ишлаган мураббийлар, промоутерлар, спарринг шериклари ва барча рақибларига миннатдорчилик билдирди. Унинг сўзларига кўра, бу сафар рингга қайтиш режалаштирилмаган.
Маълумот учун, Пол Галлен профессионал боксдаги фаолиятини 16 та ғалаба, 3 та мағлубият ва 1 та дуранг билан якунламоқда. Австралия регби лигасида машҳурликка эришган спортчи кейинчалик боксда ҳам танилган. У фаолияти давомида Марк Хант, Лукас Браун ва Сонни Билл Уильямс каби рақибларни мағлуб этган. Галленнинг сўнгги мағлубияти эса унинг узоқ давом этган спорт фаолиятига якун ясади.
