Тайсон Фьюри Усик билан учинчи жанг ўтказилиши мумкинлигига муносабат билдирди
Британиялик оғир вазн боксчиси Тайсон Фьюри Александр Усикнинг биринчи оғир вазн тоифасига қайтиб, Дэвид Бенавидесга қарши жанг қилиш режасига шубҳа билан қараётганини билдирди. Унинг фикрича, украиналик чемпион фаолиятини давом эттирадиган бўлса, энг катта молиявий ва спорт қизиқишини айнан Фьюри билан учинчи жанг уйғотади. Бу ҳақда Boxing News нашри хабар бермоқда.
Манбага кўра, Усик оғир вазн тоифасида катта муваффақиятларга эришганидан кейин аввал чемпион бўлган биринчи оғир вазнга қайтиш имкониятини кўриб чиқмоқда. Украиналик спортчи Дэвид Бенавидесга қарши жанг қилиш истагини ҳам очиқ билдирган. Бироқ Фьюри собиқ рақибининг вазн камайтириб, бошқа дивизионга қайтишини эҳтимолдан йироқ деб ҳисоблайди. У Усикнинг бу қарори ортида қандай спорт ва молиявий манфаатлар борлиги масаласига ҳам тўхталган.
«Менимча, бундай бўлмайди. Агар мен билан жанг қилмаса, Усик бошқа рингга чиқмайди», — дея Фьюрининг сўзларини келтирган нашр. Британиялик боксчи украиналик спортчи билан учинчи тўқнашув катта даромад келтириши мумкинлигини айтган. Унинг билдиришича, улар эҳтимолий жанг ҳақида аввал ҳам суҳбатлашган ва Усик март ойидан олдин рингга қайта олмаслигини маълум қилган. Шунга қарамай, учинчи беллашув юзасидан ҳозирча расмий келишув мавжуд эмас.
Маълумот учун, Фьюри ва Усик 2024 йилда икки марта тўқнаш келган ва ҳар икки жангда украиналик боксчи ҳакамлар қарори билан ғалаба қозонган. Усик кейинчалик оғир вазндаги фаолиятини давом эттириб, яна йирик совринларни қўлга киритди. Фьюри эса навбатдаги жангини Энтони Жошуага қарши ўтказишга тайёргарлик кўраётгани айтилмоқда. Усик билан трилогия эса ҳозирча фақат муҳокама қилинаётган эҳтимолий вариантлардан бири бўлиб қолмоқда.
