Канело Бивол ва Бетербиевга қарши жанг қила оладими? Собиқ чемпион жавоб берди
Профессионал бокснинг таниқли юлдузи Саул “Канело” Алвареснинг Дмитрий Бивол ва Артур Бетербиевга қарши эҳтимолий жанглари яна муҳокамаларга сабаб бўлди. Собиқ жаҳон чемпиони Серxио Мора мексикалик боксчининг яримоғир вазндаги ушбу рақибларга қарши имкониятларини баҳолади. Унинг фикрича, Бивол ва Бетербиевнинг жисмоний устунлиги Канело учун жиддий муаммо туғдириши мумкин. Бу ҳақда Boxing News 24 нашри хабар бермоқда.
Манбага кўра, Мора DAZN Boxing дастурида Канелонинг ушбу икки боксчига қарши жанг қилиш имкониятига шубҳа билдирган. У Биволнинг ҳаракатчанлиги, оёқларда ишлаш тезлиги ва кучли олд қўл зарбасини алоҳида таъкидлаган. Мутахассис Бетербиевнинг зарба кучи ҳамда рингдаги техник ҳаракатлари мексикалик спортчи учун хавф туғдиришини қайд этган. Моранинг фикрича, Бивол ва Бетербиев табиий яримоғир вазн боксчилари бўлгани учун улар Канелодан жисмоний жиҳатдан устун.
Бироқ Boxing News 24 муаллифи Дэн Амброуз бу фикрга тўлиқ қўшилмаган. У Канело аввал ҳам юқори вазн тоифасига кўтарилиб, кучли рақибларни мағлуб этганини эслатган. Хусусан, мексикалик боксчи 2019 йилда Сергей Ковалёвни нокаут қилиб, WBO камари соҳибига айланган эди. Шу сабабли журналист рақибнинг гавдаси каттароқ бўлиши Канелонинг имкониятларини бутунлай инкор этиш учун етарли асос эмаслигини таъкидлаган. Мазкур масала бокс мутахассислари орасида баҳсли бўлиб қолмоқда.
Маълумот учун, Канело 2019 йил ноябрида Ковалёвни 11-раундда техник жиҳатдан ҳал қилувчи зарбалар серияси билан нокаутга учратган. Бивол билан аввалги учрашувида эса мексикалик спортчи ҳакамлар қарори билан мағлуб бўлган. Канело ва Бетербиев ўртасидаги жанг, шунингдек, Бивол билан навбатдаги реванш ҳозирча расман эълон қилинмаган. Серxио Моранинг баёноти ҳам айнан эҳтимолий тўқнашувлар таҳлилига бағишланган.
