Бугун WBC чемпионлик камари учун реванш бўлади: ўзбекистонлик боксчи ҳам рингга чиқади
Бугун, 7 ноябрь куни Англиянинг Манчестер шаҳрида профессионал бокс бўйича йирик турнир ташкил этилади. Кечанинг асосий жангида Жошуа Буатси ва Вилли Хатчинсон иккинчи марта ўзаро тўқнаш келади. Уларнинг 12 раундга мўлжалланган беллашувида яримоғир вазн тоифасидаги вакант WBC чемпионлик камари ўртага қўйилади. Бу ҳақда Boxing News 24 нашри хабар бермоқда.
Манбага кўра, боксчилар аввал 2024 йил сентябрь ойида Лондондаги «Уэмбли» стадионида рингга чиққан. Ўшанда Буатси рақибини олтинчи ва тўққизинчи раундларда нокдаунга учратиб, ҳакамларнинг алоҳида қарори билан ғалаба қозонган эди. Икки нафар ҳакам устунликни Буатсига берган бўлса, учинчи ҳакам Хатчинсонни ғолиб деб топган. Шу сабабли биринчи жанг натижаси юзасидан баҳслар юзага келган ва реваншга қизиқиш кучайган.
Иккинчи тўқнашув олдидан ҳар икки боксчи расмий вазн ўлчаш маросимидан муваффақиятли ўтди. Буатси 79,3 килограмм, Хатчинсон эса 79,2 килограмм натижа қайд этди. Баҳс Манчестер шаҳридаги AO Arena мажмуасида ташкил этилади. Буатси аввалги ғалабасини такрорлашга, Хатчинсон эса мағлубият учун реванш олишга интилади. Беллашув ғолиби яримоғир вазннинг янги WBC чемпионига айланади.
Маълумот учун, мазкур бокс оқшомида ўзбекистонлик Жавоҳир Умматалиев ҳам рингга чиқиши режалаштирилган. Ҳамюртимизнинг рақиби Хавьер Сантана бўлиб, уларнинг жанги олти раундга мўлжалланган. Вазн ўлчашда Умматалиев 78,1 килограмм, Сантана эса 77,9 килограмм қайд этган. Асосий жанглар DAZN платформаси орқали намойиш этилади. Турнир натижалари беллашувлар якунлангандан кейин расман маълум бўлади.
