Bugun WBC chempionlik kamari uchun revansh bo‘ladi: o‘zbekistonlik bokschi ham ringga chiqadi
Bugun, 7-noyabr kuni Angliyaning Manchester shahrida professional boks bo‘yicha yirik turnir tashkil etiladi. Kechaning asosiy jangida Joshua Buatsi va Villi Xatchinson ikkinchi marta o‘zaro to‘qnash keladi. Ularning 12 raundga mo‘ljallangan bellashuvida yarimog‘ir vazn toifasidagi vakant WBC chempionlik kamari o‘rtaga qo‘yiladi. Bu haqda Boxing News 24 nashri xabar bermoqda.
Manbaga ko‘ra, bokschilar avval 2024-yil sentabr oyida Londondagi “Uembli” stadionida ringga chiqqan. O‘shanda Buatsi raqibini oltinchi va to‘qqizinchi raundlarda nokdaunga uchratib, hakamlarning alohida qarori bilan g‘alaba qozongan edi. Ikki nafar hakam ustunlikni Buatsiga bergan bo‘lsa, uchinchi hakam Xatchinsonni g‘olib deb topgan. Shu sababli birinchi jang natijasi yuzasidan bahslar yuzaga kelgan va revanshga qiziqish kuchaygan.
Ikkinchi to‘qnashuv oldidan har ikki bokschi rasmiy vazn o‘lchash marosimidan muvaffaqiyatli o‘tdi. Buatsi 79,3 kilogramm, Xatchinson esa 79,2 kilogramm natija qayd etdi. Bahs Manchester shahridagi AO Arena majmuasida tashkil etiladi. Buatsi avvalgi g‘alabasini takrorlashga, Xatchinson esa mag‘lubiyat uchun revansh olishga intiladi. Bellashuv g‘olibi yarimog‘ir vaznning yangi WBC chempioniga aylanadi.
Ma’lumot uchun, mazkur boks oqshomida o‘zbekistonlik Javohir Ummataliev ham ringga chiqishi rejalashtirilgan. Hamyurtimizning raqibi Xavyer Santana bo‘lib, ularning jangi olti raundga mo‘ljallangan. Vazn o‘lchashda Ummataliev 78,1 kilogramm, Santana esa 77,9 kilogramm qayd etgan. Asosiy janglar DAZN platformasi orqali namoyish etiladi. Turnir natijalari bellashuvlar yakunlangandan keyin rasman ma’lum bo‘ladi.
