Ronalduning 982-goli bahs-munozaralarga sabab bo‘ldi
Saudiya Arabistonining “An-Nassr” klubi hujumchisi Krishtianu Ronaldu “Al-Faysaliy”ga qarshi uchrashuvda kiritilgan gol muallifligi yuzasidan bahs markazida qoldi. Portugaliyalik yulduzning zarbasi raqib himoyachisiga tegib darvozadan joy oldi. Bu haqda ESPN nashri xabar bermoqda.
Manbaga ko‘ra, uchrashuvning 49-daqiqasida Joau Feliksning jarima zarbasidan uzatgan to‘pini Ronaldu boshi bilan yo‘naltirgan. Biroq to‘p “Al-Faysaliy” himoyachisi Andrey Girottoga tegib, darvozaga kirgan. Mazkur vaziyat gol muallifligi yuzasidan turli talqinlarni keltirib chiqargan.
Saudiya Arabistoni Pro-ligasi rasmiy statistikasida gol Ronaldu hisobiga yozilgan. Biroq Opta statistik xizmati vaziyatni tahlil qilib, uni Girottoning avtogoli sifatida baholagan. Shu tariqa portugaliyalik hujumchining faoliyatidagi gollari soni bo‘yicha statistik manbalar o‘rtasida tafovut yuzaga kelgan.
Ma’lumot uchun, “An-Nassr” mazkur uchrashuvda “Al-Faysaliy”ni 3:1 hisobida mag‘lub etdi. Saudiya ligasi hisobiga ko‘ra, Ronaldu faoliyatidagi 982-golini qayd etgan va 1000 ta gol marrasiga yetishi uchun yana 18 ta gol kerak.
