Jud Bellingham “Real Madrid” sardoriga aylanishi mumkin
Angliya milliy terma jamoasi va “Manchester Yunayted” klubining sobiq himoyachisi Rio Ferdinand Jud Bellingham kelajakda Madridning “Real” klubi sardoriga aylanishiga ishonch bildirdi.
“Agar Jud Bellingham Madridda qolishga qaror qilsa, kelajakda albatta “Real Madrid” sardoriga aylanadi. U aql bovar qilmas darajadagi futbolchi”, — dedi Ferdinand o‘z podkastida.
Angliyalik sobiq futbolchi Bellinghamning universalligi, jismoniy imkoniyatlari, himoyaviy harakatlari va muhim uchrashuvlarda tashabbusni o‘z qo‘liga olish qobiliyatini alohida e’tirof etdi. Ferdinandning fikricha, Bellingham Angliya terma jamoasidagi o‘yinlari bilan Pol Skoulz, Frenk Lempard va Stiven Jerrarddan ham o‘zib ketgan.
Ma’lumot uchun, Bellingham UEFA Millatlar ligasi doirasida Ispaniyaga qarshi kechgan uchrashuvda golli uzatmani amalga oshirdi. Bu uning 2026-yilda milliy terma jamoa safidagi yettinchi golli uzatmasi bo‘lib, ushbu ko‘rsatkich Angliya terma jamoasining bir kalendar yilidagi yangi rekordiga aylandi.