2027-yilgi “Oltin to‘p” uchun asosiy favorit e’lon qilindi
2026-yilgi “Oltin to‘p” mukofoti topshirilganidan ikki kun o‘tib, kelasi yilgi sovrin uchun dastlabki favoritlar reytingi e’lon qilindi. Ro‘yxatda “Barselona”ning 19 yoshli hujumchisi Lamin Yamal birinchi o‘rinni egalladi. Bu haqda Goal nashri xabar bermoqda.
Manbaga ko‘ra, reytingning ikkinchi pog‘onasidan Madridning “Real” klubi hujumchisi Kilian Mbappe joy olgan. Kuchli uchlikni esa “Barselona”ning braziliyalik futbolchisi Rafinya yakunlagan. 2026-yilgi “Oltin to‘p” sohibi Harri Keyn to‘rtinchi, PSJ hujumchisi Dezire Due beshinchi, “Bavariya” yarim himoyachisi Maykl Olise esa oltinchi o‘rinda qayd etilgan.
Kuchli o‘ntalikdan shuningdek, PSJ yarim himoyachisi Vitinya, “Manchester Siti” hujumchisi Erling Holand, “Arsenal” futbolchisi Deklan Rays va PSJ vakili Usmon Dembele ham o‘rin olgan. Goal nashri Lamin Yamalning mavsum boshidagi yuqori saviyali o‘yinlarini alohida e’tirof etgan. Biroq mazkur ro‘yxat hozircha jurnalistlarning dastlabki prognozi bo‘lib, mavsum davomida futbolchilarning natijalariga qarab o‘zgarishi mumkin.
Ma’lumot uchun, 2026-yilgi “Oltin to‘p” mukofotini “Bavariya” hujumchisi Harri Keyn qo‘lga kiritgan edi. Ovoz berish yakunlariga ko‘ra, Kilian Mbappe ikkinchi, Lamin Yamal esa uchinchi o‘rinni egallagan. 2027-yilgi sovrin uchun kurashda futbolchilarning klublardagi natijalari, ayniqsa UEFA Chempionlar ligasidagi ishtiroki muhim ahamiyat kasb etishi kutilmoqda.
