2027-йилги “Олтин тўп” учун асосий фаворит эълон қилинди
2026-йилги “Олтин тўп” мукофоти топширилганидан икки кун ўтиб, келаси йилги соврин учун дастлабки фаворитлар рейтинги эълон қилинди. Рўйхатда “Барселона”нинг 19 ёшли ҳужумчиси Ламин Ямал биринчи ўринни эгаллади. Бу ҳақда Goal нашри хабар бермоқда.
Манбага кўра, рейтингнинг иккинчи поғонасидан Мадриднинг “Реал” клуби ҳужумчиси Килиан Мбаппе жой олган. Кучли учликни эса “Барселона”нинг бразилиялик футболчиси Рафинья якунлаган. 2026-йилги “Олтин тўп” соҳиби Харри Кейн тўртинчи, ПСЖ ҳужумчиси Дезире Дуэ бешинчи, “Бавария” ярим ҳимоячиси Майкл Олисе эса олтинчи ўринда қайд этилган.
Кучли ўнталикдан шунингдек, ПСЖ ярим ҳимоячиси Витинья, “Манчестер Сити” ҳужумчиси Эрлинг Холанд, “Арсенал” футболчиси Деклан Райс ва ПСЖ вакили Усмон Дембеле ҳам ўрин олган. Goal нашри Ламин Ямалнинг мавсум бошидаги юқори савияли ўйинларини алоҳида эътироф этган. Бироқ мазкур рўйхат ҳозирча журналистларнинг дастлабки прогнози бўлиб, мавсум давомида футболчиларнинг натижаларига қараб ўзгариши мумкин.
Маълумот учун, 2026-йилги “Олтин тўп” мукофотини “Бавария” ҳужумчиси Харри Кейн қўлга киритган эди. Овоз бериш якунларига кўра, Килиан Мбаппе иккинчи, Ламин Ямал эса учинчи ўринни эгаллаган. 2027-йилги соврин учун курашда футболчиларнинг клублардаги натижалари, айниқса УЕФА Чемпионлар лигасидаги иштироки муҳим аҳамият касб этиши кутилмоқда.
